شاومی پەردەی لەسەر مۆبایلی ڕێدمی نۆت ۱۷ پرۆ مەکس بە پاترییەکی زەبەلاحی ۱۰ هەزار میلی‌ئەمپێر/کاتژمێری لە ژاپۆن لادا.
شیاومی لە بازاڕی ژاپۆندا پەردەی لەسەر مۆبایلی ڕێدمی نۆت ۱۷ پرۆ مەکس (Redmi Note 17 Pro Max) لادا. ئەم بەرهەمە یەکەمین مۆدێلی "پرۆ مەکس"ـە لە مێژووی زنجیرەی ڕێدمی نۆتدا و یەکەمین مۆبایلی شیاومییە کە پاترییەکی زەبەلاحی ۱۰ هەزار میلی‌ئەمپێر/کاتژمێری لەخۆدەگرێت.
تایبەتمەندییەکانی ڕێدمی نۆت ١٧ پرۆ مەکس
پاترییە ۱۰ هەزار میلی‌ئەمپێر/کاتژمێرییەکەی ئامێرەکە لەسەر بنەمای تەکنەلۆژیای سیلیکۆن-کاربۆن دروست کراوە. شیاومی دەڵێت، ماوەی کارکردنی پاترییەکە لە بەکارهێنانی ئاساییدا تا سێ ڕۆژ دەمێنێتەوە و بارگاویکردنەوەی خێرای بەسیمی ۱۰۰ واتی دەتوانێت وزەی پێویست بۆ ڕۆژێکی تەواو تەنها لە ماوەی ۲۰ خولەکدا دابین بکات.
بە وتەی شیاومی، توانستی پاترییەکە دوای ۱۶۰۰ خولی بارگاویکردنەوە (هاوتای نزیکەی ۶ ساڵ بەکارهێنان) هێشتا لە سەرووی ۸۰٪ دەمێنێتەوە و تایبەتمەندیی بارگاویکردنەوەی پێچەوانەی بەسیم بە توانای ۲۷ وات بۆ بارگاویکردنی ئامێرەکانی تر لەبەردەست بەکارهێنەراندایە.
جەستە
جەستەی مۆبایلەکە لەسەر بنەمای پێکهاتەی بەهێزی Redmi Titan Structure دیزاین کراوە و بڕوانامەی ستانداردەکانی خۆڕاگریی IP66 و IP68ی لەگەڵ بەڵگەنامەی تاقیکردنەوەی ۷۲ کاتژمێر مانەوە لە قووڵایی ۲ مەتری ئاودا لە دامەزراوەی TÜV SÜD وەرگرتووە. بەکارهێنەران دەستیان بە دۆخی تایبەتیی وێنەگرتن لەژێر ئاودا دەگات. ڕوونمای مۆبایلەکە بە شووشەی گۆریلا گڵاس ڤیکتۆس ۲ پارێزراوە و بڕوانامەی خۆڕاگری لە بەرامبەر کەوتنەخوارەوە لە بەرزیی ۳ مەتر لە دامەزراوەی SGS پێبەخشراوە.
روونما، رەقەکاڵا و نەرمەواڵە
ڕوونما ۶٫۸۳ ئینجییەکەی ئامێرەکە ڕوونیی 1.5K، ڕووناکیی زۆرینەی ۳۵۰۰ نیت، تێکڕای نوێبوونەوەی ۱۲۰ هێرتز و تێکڕای نموونەگریی دەستلێدانی ۳۲۰۰ هێرتز پێشکەش دەکات. پڕۆسێسکردنی زانیارییەکان لە ئەستۆی چیپسێتی سناپدراگۆن ۶ نەوەی ۵ی کوالکۆمدایە کە لەگەڵ زۆرینەی ۱۶ گێگابایت ڕامدا تێکەڵ دەکرێت. بەشی نەرمەواڵەش لەلایەن ڕووکاری بەکارهێنەری HyperOS 3 بە تایبەتمەندییەکانی ژیری دەستکردی وەک وەرگێڕانی ئۆفلاین بەڕێوەدەبرێت و شیاومی گەرەنتیی ۴ نوێکردنەوەی گەورەی سیستەمی کارپێکردن و ۶ ساڵ نوێکردنەوەی ئەمنی بۆ کڕیاران دەکات.
کامێرا
کامێرای سەرەکیی ئامێرەکە بە سێنسۆری ۵۰ مێگاپێکسڵی بە جێگیرکەری ئۆپتیکی (OIS) تەیار کراوە کە کامێرایەکی گۆشەفراوانی ۸ مێگاپێکسڵی هاوڕێیەتی دەکات. کامێرای سێڵفیش ڕوونیی ۳۲ مێگاپێکسڵی هەیە.
رەنگ
مۆبایلەکە بە ڕەنگەکانی ڕەش، مۆر و وەشانی تایبەتی Cloud Blush دەخرێتە بازاڕەوە؛ ڕەنگی سێیەم بەهۆی تەکنەلۆژیای فۆتۆکرۆمیکەوە لەژێر تیشکی خۆردا لە سپییەوە بۆ پەمەیی-پرتەقاڵی دەگۆڕێت. ئەستوورایی مۆدێلەکان لە نێوان ۸٫۵۷ بۆ ۸٫۶۵ ملیمەتر و کێشیان ۲۲۹٫۵ گرامە.
نرخ
نرخی مۆبایلەکە لە وەشانی تەیارکراو بە ۸ گێگابایت ڕام و ۲۵۶ گێگابایت بیرگەی ناوەکی بە ۷۹ هەزار و ۹۸۰ یوان (نزیکەی ۵۰۲ دۆلار) دیاری کراوە. نرخی ڕێدمی نۆت ۱۷ پرۆ مێکس لە مۆدێلی ۵۱۲ گێگابایتیدا بە ۹۹ هەزار و ۹۸۰ یوان (نزیکەی ۶۲۸ دۆلار) دەفرۆشرێت.
