دوای بڵاوبوونەوەی چەندین ڤیدیۆی دزەپێکراو لە یاری Grand Theft Auto VI (GTA 6)، کۆمپانیای Take-Two Interactive فەرمانی بانگهێشتی دادگای بۆ مایکرۆسۆفت و دیسکۆرد دەرکردووە و داوای ڕوونکردنەوە لەم بارەیەوە دەکات.
بەپێی ڕاپۆرتێکی Kotaku، ئەم کۆمپانیایە بەدوای زانیاریدایە لەسەر ئەو ناوەڕۆکانەیە کە «مافی خاوەندارێتیی هزری» (Intellectual Property)ی پەیوەندیدار بەم یارییەی پێشێل کردووە. لەو فەرمانە دادوەرییانەی کە ڕۆژی پێنجشەممە تۆمار کراون، کۆمپانیای Take-Two Interactive ڕایگەیاندووە کە ناوەڕۆکی خاوەن مافی لەبەرگرتنەوە (کۆپی رایت) بریتین لە «ناوەڕۆکی دەنگی و بینراو، بەرهەمە هونەرییەکان، وێنەکان، دیالۆگەکان یان توخمە داڕێژراوە داهێنەرانەکانی تر» و ئەم کۆمپانیایە بەتەمایە ناسنامەی «ئەو کەسانەی گومانی پێشێلکردنی مافی خاوەندارێتیی هزرییان لێدەکرێت» ئاشکرا بکات. بەپێی ئەم فەرمانە دادوەرییانە، مایکرۆسۆفت و دیسکۆرد تا ۴ی سێپتەمبەر مۆڵەتیان هەیە زانیارییە داواکراوەکان پێشکەش بکەن.
ئەم فەرمانە دادوەرییە بەهۆی پێشێلکردنی مافی لەبەرگرتنەوە دەرکراوە
لەسەر ڤیدیۆ دزەپێکراوەکان واتەرمارکی کەسێک یان گرووپێک بە ناوی «CyberLeek» دەبینرێت و تێیاندا کەسایەتییەک کە پێدەچێت «جەیسن دووڤاڵ» (Jason Duval)، یەکێک لە دوو کارەکتەرە سەرەکییەکەی GTA VI بێت، خەریکی ئەنجامدانی چالاکیی جۆراوجۆردایە لەوانە شۆفێری، لێخوڕینی فڕۆکە، بەکارهێنانی شۆکەری کارەبایی و هێرشکردنە سەر کەسێک بە ئاچوار. لە یەکێک لەم ڤیدیۆیانەدا، یاریزانەکە بە تەقەکردن لە دیوار، وشەی «LEEK» لەسەری دروست دەکات.
مایکرۆسۆفت و دیسکۆرد تا ئێستا وەڵامی داواکاریی میدیاکانیان بۆ دەربڕینی ڕا نەداوەتەوە. سەرەڕای ئەمەش، «سکۆت ڤان ڤلێت»، بەڕێوەبەری باڵای تەکنەلۆژیای ئێکس بۆکس (Xbox)، لە تۆڕی کۆمەڵایەتیی X ڕایگەیاندووە: «ئێمە لە نزیکەوە لەگەڵ Take-Two و Rockstar Games هاوکاری دەکەین بۆ پاڵپشتیکردن لە هەوڵەکانی پاراستنی بەرهەمە داهێنەرانەکان و مافەکانی خاوەندارێتیی هزری.»
ئەم دزەپێکردنانە لە کاتێکدا ڕوویانداوە کە ڕاکستار بەنیازە پێشبینینێکی (Preview) ورد و نوێی یاریەکە لە ڕێکەوتی ۲۷ی ئاب لە ڕێگەی نێتفلێکسەوە بڵاوبکاتەوە. وەشانی کۆتایی یاریەکەش بڕیارە لە ۱۹ی نۆڤەمبەر بخرێتە بازاڕەوە.
دیارە ئەمە یەکەمجار نییە کە زانیارییەکانی GTA VI لەلایەن هاککەرانەوە دزەی پێدەکرێت. لە ساڵی ۲۰۲۲دا، یەکێک لە ئەندامانی گرووپی هاککەری Lapsus$ وێنە و ڤیدیۆکانی ئەم یاریەی بڵاوکردەوە کە بە شێوەیەکی سەیر لە ڕێگەی ئامێرێکی Amazon Fire TV Stickەوە ئەنجامدرا. دوای ئەوەی هەڵسەنگاندنی تەندروستیی دەروونی دەریخست کە ئەم هاککەرە توانای ئامادەبوونی لە دادگای نییە و لە ئەگەری ئازادبوونیدا بەنیازی دووبارەکردنەوەی تاوانی سایبەرییە، دادوەر سزای خەواندن لە نەخۆشخانەی بەسەردا سەپاند.
